蕙贞见善卿已去，才上床来歪在莲生身上，给他烧烟。莲生接连吸了七八口，渐渐合拢眼睛，似乎睡去。蕙贞低声叫道：“王老爷安置罢。”莲生点点头。于是端过烟盘，收拾共睡。
次日一点钟辰光，两人始起身洗脸。老娘姨搬上稀饭来吃了些，蕙贞就在梳妆台前梳头。老娘姨仍把烟盘摆在床上。莲生自去吸起烟来，心想沈小红家须得先去撒个谎，然后再慢慢的告诉他才好。盘算一回，打定主意，便取马褂着了要走。蕙贞忙问：“陆里去？”莲生道：“我到沈小红搭去一埭。”蕙贞道：“价末吃仔饭了去囗。”莲生道：“（要勿）吃哉。”蕙贞又问：“晚歇阿来吸？”莲生想了想，说道：“耐明朝啥辰光到东合兴去？”蕙贞道：“倪一早就过去哉。”莲生道：“我明朝一点钟到东合兴来。”蕙贞道：“耐有工夫末晚歇来一埭。”
莲生应诺，踅下楼来；来安跟了，出祥春里，向东至西荟芳里弄口，令来安回公馆去打轿子来，自己即转弯进弄。娘姨阿珠先已望见，喊道：“阿唷，王老爷来哉！”赶忙迎出天井里，一把拉住袖子；进去又喊道：“先生，王老爷来哉。”拉到楼梯边，方放了手。
莲生款步上楼。沈小红也出房相迎，似笑不笑的说道：“王老爷，耐倒好意思……”说得半句，哽噎住了。莲生见他一副凄凉面孔，着实有些不过意，嘻着嘴进房坐下。沈小红也跟进来，挨在身傍，挽着莲生的手，问道：“我要问耐，耐三日天来哚陆里？”莲生道：“我来里城里，为仔个朋友做生日，去吃仔三日天酒。”小红冷笑道：“耐只好去骗骗小干仵！”阿珠绞上手巾，揩了。小红又问道：“耐来哚城里末，夜头阿转来嗄？”莲生道：“夜头末就住来哚朋友搭哉（口宛）。”小红道：“耐个朋友倒开仔堂子哉！”莲生不禁笑了。小红也笑道：“阿珠，耐哚听听俚闲话！我前日仔教阿金大到耐公馆里来看耐，说轿子末来哚，人是出去哉。耐两只脚倒燥来哚（口宛），一直走到仔城里。阿是坐仔马车打城头浪跳进去个嗄？”阿珠呵呵笑道：“王老爷难也有点勿老实哉！陆里去想得来好主意，说来保城里。”小红道：“瞒倒瞒得紧哚，连朋友哚寻仔好几埭也寻勿着。”阿珠道：“王老爷，耐也老相好哉，耐就说仔要去做啥人也无啥（口宛），阿怕倪先生勿许耐嗄？”小红道：“耐去做啥人也匆关倪事。耐定规要瞒仔倪了去做，倒好像是倪吃醋，勿许耐去，阿要气煞人！”
莲生见他们一递一句，插不下嘴去，只看着讪笑。及至阿珠事毕下楼，莲生方向小红说道：“耐（要勿）去听啥别人个闲话。我搭耐也三四年哉。我个脾气，耐阿有啥勿晓得？我就是要去做啥人末，搭耐说明白仔再做末哉（口宛），瞒耐做啥？”小红道：“我也匆晓得耐（口宛）。耐自家去想想看：耐一直下来，东去叫个局，西去叫个局，我阿曾说歇啥一句闲话嗄？耐第歇倒要瞒我哉，故末为啥呢？”莲生道：“我是无价事，勿是要瞒耐。”小红道：“我到猜着耐个意思来里：耐也勿是要瞒我，耐是有心来哚要跳槽哉，阿是？我倒要看耐跳跳看！”
莲生一听，沉下脸，别转头，冷笑道：“我不过三日天勿曾来，耐就说是跳槽。从前我搭耐说个闲话，阿是耐忘记脱哉？”小红道：“正要耐说（口宛）。耐勿忘记末，耐说囗，三日天来哚陆里？做个啥人？耐说出来，我匆搭耐吵末哉。”莲生道：“耐教我说啥囗？我说来里城里，耐勿信。”小红道：“耐倒还要拨当水我上，我打听仔了再问耐。”莲生道：“故末蛮好。第歇耐来哚气头浪，搭耐也无处去说；隔两日等耐快活仔点，我再搭耐说个明白末哉。”
小红鼻子里哼了一声，半日不言语。莲生央告道：“倪去吃筒烟去囗。”小红仍拉着手，同至榻床前。莲生脱去马褂，躺下吸烟。小红却呆呆的坐在下手。莲生要想些闲话来说，又没甚说的。
忽听得楼梯上一阵脚声，跑进房来，却是大姐阿金大。一见莲生，说道：“王老爷，我末到耐公馆里请耐，耐倒先来里哉。”又道：“王老爷为啥几日匆来，阿是动气哉？”莲生不答。小红嗔道：“动啥气嗄！打两记耳光哉囗，动气！”阿金大道：“王老爷，耐匆来仔末，倪先生气得来，害倪一埭一埭来请耐。难（要勿）实概，阿晓得！”说着，移过一碗茶来，放在烟盘里，随把马褂去挂在衣架上，要去。