子富听了，冷笑两声。黄二姐也笑道：“阿是耐有点勿相信我闲话？耐问声汤老爷看，汤老爷蛮明白哚。汤老爷，耐想囗，倘然俚搭罗老爷勿要好末，罗老爷陆里叫得到十几个局嗄？俚心里来哚要好，嘴里终勿肯说出来，连搭娘姨、大姐哚才匆晓得俚心里个事体，单有我末稍微摸着仔点。倘然我故歇放罗老爷去仔，晚歇俚转来就要埋冤我哉（口宛）。我老实搭罗老爷说仔罢：俚做大生意下来，也有五年光景哉，通共就做仔三户客人，一户末来里上海，还有两户，一年上海不过来两埭，清爽是清爽得野哚。我再要俚自家看中仔一户客人，搭我多做点生意，故是难杀哚囗。推扳点客人（要勿）去说哉，就算客人末蛮好，俚说是无长性，只好拉倒，教我阿有啥法子嗄？为此我看见俚搭罗老爷蛮要好末，望罗老爷一直做下去，我也好多做点生意。勿然是老实说，像罗老爷个客人到倪搭来也勿少（口宛），走出走进，让俚哚去，我阿曾去应酬歇？为啥单是耐罗老爷末要我来陪陪耐嗄？”
子富仍是默然，汤啸庵也微微含笑。黄二姐又道：“罗老爷做末做仔半个月，待倪翠凤也总算无啥，不过倪翠凤看仔好像罗老爷有老相好来哚，倪搭是垫空个意思。我倒搭俚说：‘耐也巴结点，有啥老相好、新相好，罗老爷阿会待差仔倪嗄？’俚说：‘隔两日再看末哉。’前日仔俚出局转来，倒搭我说道：‘无(女每)，耐说罗老爷搭倪好，罗老爷到仔蒋月琴搭吃酒去哉。’我说：‘多吃台把酒是也算勿得啥。’陆里晓得倪翠凤就多心哉囗，说：‘罗老爷原搭老相好要好末，阿肯搭倪要好嗄？’”
子富听到这里，不等说完，接嘴道：“故是容易得势，就摆起来吃一台末哉（口宛）。”黄二姐正色道：“罗老爷耐做倪翠凤，倒也匆在乎吃酒勿吃酒。（要勿）为仔我一句闲话，吃仔酒了，晚歇翠凤原不过实概，例说我骗耐。耐要做倪翠凤末，耐定归要单做倪翠凤一个哚，包耐十二分巴结，无拨一点点推扳。（要勿）做做倪翠凤，再去做做蒋月琴，做得两头勿讨好。耐勿相信我闲话，耐就试试看，看俚那价功架，阿巴结勿巴结。”子富笑道：“故也容易得势，蒋月琴搭就匆去仔末是哉（口宛）。”黄二姐低头含笑，又吸了一口水烟，方说道：“罗老爷，耐倒也会说笑话哚！四五年老相好，说勿去就匆去哉，也亏耐说仔出来。倒说道容易得势，阿是来骗骗倪？”一面说，一面放下水烟筒，往对过房间里做什么去了。
子富回思陶云甫之言不谬，心下着实钦慕；要与汤啸庵商量，却又不便。自己忖度一番，坐起来呷口茶。珠凤忙送过水烟筒，子富仍摇手不吸。只见小阿宝和金凤两个爬在梳妆台前，凑近灯光，攒头搭颈，又看又笑。子富问：“啥物事？”金凤见问，劈手从小阿宝手中抢了，笑嘻嘻拿来与子富看，却是半个胡桃壳，内塑着五色粉捏的一出春宫。子富呵呵一笑。金凤道：“耐看囗。”拈着壳外线头抽拽起来，壳中人物都会摇动。汤啸庵也踅过来看了看，问金凤道：“耐阿懂嗄？”金凤道：“葡萄架（口宛），阿有啥勿懂。”小阿宝忙笑阻道：“耐（要勿）搭俚说囗，俚要讨耐便宜呀。”说笑问，黄二姐又至这边房里来，因问：“耐哚笑啥？”金凤又送去与黄二姐看。黄二姐道：“陆里拿得来嗄？原搭俚放好仔，晚歇弄坏仔末再要拨俚说哉。”金凤乃付与小阿宝将去收藏了。
罗子富立起身，丢个眼色与黄二姐，同至中间客堂，不知在黑暗里说些什么。咕唧了好一会，只听得黄二姐向楼窗口问：“罗老爷管家阿来里？教俚上来。”一面见子富进房，即叫小阿宝拿笔砚来央汤啸庵写请客票，只就方才同席的胡乱请几位。黄二姐亲自去点起一盏保险台灯来，看着啸庵草草写毕，给小阿宝带下，令外场去请。
黄二姐向子富道：“耐管家等来里，阿有啥说嗄？”子富说：“叫俚来。”高升在外听唤，忙掀帘进门候示。子富去身边取出一串钥匙，吩咐高升道：“耐转去到我床背后开第三只官箱，看里面有只拜盒拿得来。”高升接了钥匙，领命而去。
黄二姐问：“台面阿要摆起来？”子富抬头看壁上的挂钟，已至一点二刻了，乃说：“摆起来罢，天勿早哉。”汤啸庵笑道：“啥要紧！等翠凤出局转来仔，正好。”黄二姐慌道：“催去哉。俚哚是牌局，要末来哚替碰和，勿然陆里有实概长远嗄。”随喊：“小阿宝，耐去催催罢，教俚快点就转来。”小阿宝答应，正要下楼。黄二姐忽又叫住道：“耐慢点，我搭耐说囗。”说着，急赶出去，到楼梯边和小阿宝咬耳朵叮嘱几句，道：“记好仔。”