赵桂林迎进房间，叫声“方老爷”，道：“阿是倪怠慢仔耐，耐一埭也匆来？”蓬壶微笑坐下。外婆搭讪道：“方老爷就前节壶中天叫仔局下来末，勿曾来歇。两个多月哉，阿好意思？”桂林接嘴道：“拨个文君王迷昏哉呀，陆里想得着该搭来？”蓬壶慌的喝住，道：“耐（要勿）睛说！文君王是我女弟子，客客气气，耐去糟蹋俚，岂有此理！”桂林哼了一声无语。外婆一面装水烟，一面悄悄说道：“倪小姐生意，瞒勿过耐方老爷。前节方老爷来里照应，倒哝仔过去。故歇耐也匆来裁，连浪几日天，出局才无投。下头杨媛媛末碰和吃酒，闹猛得来。倪楼浪冰清水冷，阿要坍台！”蓬壶不等说完，就叉口道：“单是个碰和吃酒，俗气得势。我前回替桂林上仔新闻纸，天下十八省个人，陆里一个勿看见？才晓得上海有个赵桂林末。实概样式，比仔碰和吃酒，难说哚！”外婆顺他口气，复接说道：“难方老爷原像前回照应点俚罢。耐一样去做个文君王，就倪搭走走，啥勿好？吃两台酒，碰两场和，故是倪要巴结煞哉！”蓬壶道：“碰和吃酒末，啥稀奇嗄？等我过仔明朝，再去搭俚做两首诗末哉。”外婆道：“方老爷，耐末无啥稀奇，倪倒是碰和吃酒个好。耐辛辛苦苦做仔啥物事送拨俚，俚用勿着（口宛）！就匆是碰和吃酒末，有场花应酬，叫叫局，故也无啥。”蓬壶呵呵冷笑，连说：“俗气得势！”
外婆见蓬壶呆头呆脑，说不入港，望着赵桂林打了一句市俗泛语。桂林但点点头，蓬壶那里懂得？外婆水烟装毕，桂林即请蓬壶点菜，欲留便饭。蓬壶力辞不获，遂说不必叫菜，仅命买些熏腊之品。外婆传命外场买来，和自备饭菜一并搬上。
第五十九回终。
------------------
豆豆书库收集整理
按：方蓬壶和赵桂林两个并用晚饭之后，外婆收拾下楼。稍停片刻，蓬壶即拟兴辞。桂林苦留不住，送出楼门日，高声喊“外婆”，说：“方老爷去哉！”
外婆听得，赶上叫道：“方老爷慢点囗，我搭耐说句闲话。”蓬壶停步问：“说啥？”外婆附耳道：“我说耐方老爷末，文君玉搭（要勿）去哉，倪搭一样个呀。我搭耐做个媒人，阿好？”蓬壶骤闻斯言，且惊且喜，心中突突乱跳，连半个身子都麻木了，动弹不得。外婆只道蓬壶踌躇不决，又附耳道：“方老爷，耐是老客人，勿要紧个。就不过一个局，搭仔下脚，无拨几花开消，放心末哉。”蓬壶只嘻着嘴笑，无话可说。
外婆揣知其意，重复拉回楼上房间里。桂林故意问道：“为啥耐忙煞个要去，阿是想着仔文君王？”外婆抢着说道：“啥勿是嗄，难末勿许去个哉！”桂林道：“文君玉来浪喊哉囗，耐当心点！明朝去末，端正拨生活耐吃。”蓬壶连说：“岂有此理，岂有此理！”外婆没事自去。
桂林装好一口鸦片烟，请蓬壶吸，蓬壶摇头说：“勿会。”桂林就自己吸了。蓬壶因问：“有几花瘾？”桂林道：“吃白相，一筒两筒，陆里有瘾嗄！”蓬壶道：“吃烟人才是吃白相吃上了瘾，终究（要勿）去吃俚好。”桂林道：“倪要吃上仔个瘾，阿好做生意？”
蓬壶遂问问桂林情形，桂林也问问蓬壶事业。可巧一个父母姊妹俱没，一一个妻妾子女均无；一对儿老夫老妻，大家有些同病相怜之意。
桂林道：“倪爷也开个堂子。我做清情人辰光，衣裳、头面、家生倒勿少，才是倪娘个物事。上仔客人个当，一千多局帐漂下来，难末堂子也歇哉，爷娘也死哉，我末出来包房间，倒空仔三百洋钱债。”蓬壶道：“上海浮头浮脑空心大爷多得势，做生意划一难煞。倒是倪一班人，几十年老上海，叫叫局，打打茶会，生意末勿大，倒勿曾坍歇台。堂子里才说倪是规矩人，蛮要好。”桂林道：“故歇我也匆想哉，把势饭勿容易吃，陆里有好生意做得着？随便啥客人，替我还清仔债末就跟仔俚去。”蓬壶道：“跟人生来最好，不过耐当心点，再要上仔个当，一生一世吃苦哚（口宛）。”桂林道：“难是匆个哉。起先年纪轻，勿曾懂事体，单喜欢标致面孔个小伙子，听仔俚哚海外闲话上个当；故歇要拣个老老实实个客人，阿有啥差嗄？”蓬壶道：“差是匆差，陆里有老老实实个客人去跟俚？”