忽然大门口一阵嚷骂之声，蜂拥至客堂里，劈劈拍拍打起架来。善卿失惊道：“做啥？”双珠道：“咿是阿金哚哉囗，成日成夜吵勿清爽。阿德保也匆好。”善卿便去楼窗口望下张看。只见娘姨阿金揪着他家主公阿德保辫子要拉，却拉不动，被阿德保按住阿金鬏髻，只一揿，直揿下去。阿金伏倒在地，挣不起来，还气呼呼的嚷道：“耐打我啊！”阿德保也不则声，屈一只腿压在他背上，提起拳来，擂鼓似的从肩膀直敲到屁股，敲得阿金杀猪也似叫起来。双珠听不过，向窗口喊道：“耐哚算啥嗄，阿要面孔！”楼下众人也齐声喊住，阿德保方才放手。双珠挽着善卿臂膊扳转身来，笑道：“（要勿）去看俚哚囗。”将水烟筒授与善卿自吸。
须臾，阿金上楼，撅着嘴，哭得满面泪痕。双珠道：“成日成夜吵勿清爽，也匆管啥客人来哚匆来哚。”阿金道：“俚拿我皮袄去当脱仔了，还要打我。”说着又哭了。双珠道：“阿有啥说嗄，耐自家见乖点，也吃勿着眼前亏哉（口宛）。”阿金没得说，取茶碗，撮茶叶；自去客堂里坐着哭。
接着阿德保提水铫子进房，双珠道：“耐为啥打俚嗄？”阿德保笑道：“三先生阿有啥勿晓得？”双珠道：“俚说耐当脱仔俚皮袄，阿有价事嗄？”阿德保冷笑两声，道：“三先生耐问声俚看，前日仔收得来会钱，到仔陆里去哉囗？我说送阿大去学生意，也要五六块洋钱囗，教俚拿会钱来，俚拿匆出哉呀；难末拿仔件皮袄去当四块半洋钱。想想阿要气煞人！”双珠道：“会钱末也是俚赚得来洋钱去合个会，耐倒勿许俚用。”阿德保笑道：“三先生也蛮明白哚。俚真真用脱仔倒罢哉，耐看俚阿有啥用场嗄？沓来哚黄浦里末也听见仔点响声，俚是一点点响声也无拨（口宛）。”双珠微笑不语。阿德保冲了茶，又随手绞了把手巾，然后下去。
善卿挨近双珠，悄问道：“阿金有几花姘头嗄？”双珠忙摇手道：“耐（要勿）去多说多话。耐末算说白相，拨来阿德保听见仔要吵煞哉！”善卿道：“耐还搭俚瞒啥？我也晓得点来里。”双珠大声道：“瞎说哉囗！坐下来，我搭同说句闲话。”善卿仍退下归坐。双珠道：“倪无（女每）阿曾搭耐说起歇啥？”善卿低头一想，道：“阿是要买个讨人？”双珠点头道：“说好哉呀，五百块洋钱哚。”善卿道：“人阿缥致嗄？”双珠道：“就要来快哉。我是勿曾看见，想来比双宝缥致点哚。”善卿道：“房间铺来哚陆里呢？”双珠道：“就是对过房间。双宝末搬仔下头去。”善卿叹道：“双宝心里是也巴勿得要好，就吃亏仔老实点，做匆来生意。”双珠道：“倪无（女每）为仔双宝，也豁脱仔几花洋钱哉。”善卿道：“耐原照应点俚，劝劝耐无(女每)看过点，赛过做好事。”正说时，只听得一路大脚声音，直跑到客堂里，连说：“来哉，来哉！”善卿忙又向楼窗口去看，乃是大姐巧囤跑得喘吁吁的。
善卿知道那新买的讨人来了，和双珠爬在窗槛上等候。只见双珠的亲生娘周兰亲自搀著一个清倌人进门，巧囡前走，径上楼来。周兰直拉到善卿面前，问道：“洪老爷，耐看看倪小先生阿好？”善卿故意上前去打个照面。巧囡教他叫洪老爷，他便含含糊糊叫了一声，却羞得别转脸去，彻耳通红。善卿见那一种风韵可怜可爱，正色说道：“出色哉！恭喜，恭喜！发财，发财！”周兰笑道：“谢谢耐金口。只要俚巴结点，也像仔俚哚姊妹三家头末，好哉。”口里说，手指著双珠。善卿回头向双珠一笑。双珠道：“阿姐是才嫁仔人了，好哉。单剩我一干仔，无啥人来讨得去，要耐养到老死哚，啥好嗄！”周兰呵呵笑道：“耐有洪老爷来里（口宛）。耐嫁仔洪老爷，比双福要加倍好哚。洪老爷阿是？”
善卿只是笑。周兰又道：“洪老爷先搭倪起个名字，等俚会做仔生意末，双珠就拨仔耐罢。”善卿道：“名字叫周双玉，阿好？”双珠道：“阿有啥好听点个嗄？原是‘双’啥‘双’啥，阿要讨人厌！”周兰道：“周双玉无啥；把势里要名气响末好。叫仔周双玉，上海滩浪随便啥人，看见牌子就晓得是周双珠哚个妹子哉（口宛），终比仔新鲜名字好点哚。”巧囡在傍笑道：“倒有点像大先生个名字。周双福，周双玉，阿是听仔差勿多？”双珠笑道：“耐末晓得哈差勿多。阳台浪晾来哚一块手帕子搭我拿得来。”